January 30, 2006

Блокада или тероризам?

Скопје денес е повторно под блокада!
 
Имав неодложна работа. Излегов цел саат порано. И не стигнав, секако. Поради блокадите. А мислев дека ќе имам време малку и да прошетам на воздух.
 
Се чудам до каде оди нашето разбирање на „правото“. Во овие транзициски години, кој знае колкупати видовме дека само нашето право е право, а на другите не. Никаде не е предвидено такво апсолутно право, како што е нашето „право“ за блокирање улици.
 
И во услови на војна, според меѓународните договори, треба да се гарантира правото на цивилите. Не, па, во нормални услови, како што е сега, денес.
 
Како и за секој закон што се донесуваше минативе транзициски години, и по овој предлог на Владата на РМ за донесување закон за уредување на оваа проблематика, се јавија многубројните новопечени новинари и „борци“ за човекови права. Ферманот веднаш беше донесен: овој закон е штетен за граѓанските права и слободи! Секој има право да блокира улици! Тоа е демократско право!
 
Сега одеднаш сите не се слагаме со продажбата на ЕСМ и тоа ни’ дава за „право“ да не го поддржиме новиот законот за јавни собири. Wow!!! Ептен здрава логика, нема што!
 
Јас не знам за некоја друга демократска и слободна земја во која секој има право на сешто, дури и по цена на загрозување на правата на другите.
 
Истото ни’ се случи и со пушењето. Сите беа против. Демек, имале „право“ на тоа. А каде се правата на другите што не пушат?
 
И блокирањето на улици, и пушењето имаат директно влијание врз правата на другите. И тоа негативно, ами како. Со овој начин на размислување, тешко да ја разбереме вистинската Европа.
Сето ова ме потсети на дискусиите кои траат деновиве во ЕУ: идентитетот на Европа. Зарем нашево размислување е компатибилно со европскиот идентитет?
 
Бегаме од „европското огледало“ како од ѓаволот. А толку ни’ треба да се погледнеме веќе еднаш. Тоста со егоизмот наш...
Posted by admin at 12:41:39 | Permanent Link | Comments (5) |

January 28, 2006

Нови планови за Балканот, нови надежи

Европската комисија објави стратегија за земјите од Западен Балкан, која треба да се дискутира на самитот на министрите за надворешни работи на ЕУ во февруари 2006 година.

Покрај препораките за зголемување на стапката на економскиот развој, се предлага и започнување на преговори за олеснување на визниот режим, и тоа во оваа, 2006 година.

Оли Рен, комесарот задолжен за проширување, изјави дека овие препораки се дизајнирани за фокусирање на консолидацијата на стабилноста во регионот.

Рен рече дека препораките за олеснување на визниот режим се однесуваат на научници и студенти.

Со ова конечно започнува официјализацијата на ова незгодно прашање. Факт е дека со рестриктивен визен режим не се придонесе за отворање на Македонија, туку се создаде спротивен ефект. Луѓето се дезориентирани, не знаат кој им е пријател, а кој не, и сите препораки дадени од странци ги сметаат како „напад на националните интереси“, а не како пријателски совет.

15 години транзиција придонесе „создавање“ на цела една генерација на млади луѓе, целосно изгубени во вистинскиот свет на вредности. Затворањето на луѓето во оваа мала клаустофобична држава, нивното недружење со реалниот свет, затворање на пристапот на врвната наука,  кон нови достигнувања и друго, придонесе да се изгуби цела една генерација на млади луѓе.

Со слободното движење на младите во слободни и демократски земји, ќе се создаде клима за конечно започнување на вистинските демократски промени во земјата, затоа што друго е да се види на лице место, а друго да се прочита или, не дај боже, да се чуе од политикантите.

Posted by admin at 16:48:25 | Permanent Link | Comments (2) |

January 26, 2006

Европските улици на Скопје!?

Градските власти на Скопје секоја година се „изненадени“ од снегот. Таман мислевме дека само Ристо Пенов се „изненадува“, сега гледаме дека Трифун Костовски уште повеќе се „изненадува“ од снегот.

Повеќе денови по улиците на Скопје има снег. Главните улици релативно брзо се чистат, но споредните улици со недели остануваат негибнати. Зошто да се чистат, кога и така по некое време сонцето ќе си го направи своето и ќе бидат стопени?

За време на мојот повеќегодишен престој во неколку европски метрополи, никогаш не видов градските власти да бидат „изненадени“ или затекнати од снег или невреме. Башка што и народот е поактивен, со повисока свест и одговорност кон својот град. Така, секој си го чисти својот дел од улицата.

Зошто погоре реков дека споредните улици не се гибнати и ги „нападнав“ градските власти, кога народот не си го превзема својот дел од одговорноста и си го чисти својот дел од улицата?

Одговорот е едноставен:

И да ги исчистиме своите улици, тротоари, влезови, нема никој да дојде да го собере снегот со камион.

Еве, и да паднете на мраз и си скршите рака, кој ќе биде одговорен за тоа? Некој ќе рече дека може да го тужиш градот. Да, но дали судскиот систем ни’ функционира како треба?

Значи, треба заеднички да се делува. Нема држава без народ, како ни народ без држава.

Posted by admin at 00:32:44 | Permanent Link | Comments (0) |
1 2